ಅಕ್ರಮ ಇಟ್ಟಿಗೆ ಕಾರ್ಖಾನೆಗಳ ತನಿಖೆಗೆ ಗಣಿ ಮತ್ತು ಭೂ ವಿಜ್ಞಾನ ಅಧಿಕಾರಿಗಳ ತಂಡದ ಆಗಮನ

ತಾಲ್ಲೂಕಿನಲ್ಲಿ ಎಗ್ಗಿಲ್ಲದೆ ನಡೆಯುತ್ತಿರುವ ಅಕ್ರಮ ಮರಳು ದಂಧೆಯ ಬಗ್ಗೆ ದೂರು
-------------------------------------------------
ಅಕ್ರಮ ಮರಳು ಗಣಿಗಾರಿಕೆ ಹಾಗೂ ಅಕ್ರಮ ಇಟ್ಟಿಗೆ ಕಾರ್ಖಾನೆಗಳ ತನಿಖೆಗೆ ಗಣಿ ಮತ್ತು ಭೂ ವಿಜ್ಞಾನ ಅಧಿಕಾರಿಗಳ ತಂಡದ ಆಗಮನ
--------------------------------------------

ಹುಳಿಯಾರು ಹೋಬಳಿಯ ಭಟ್ಟರಹಳ್ಳಿ ಸೇರಿದಂತೆ ಚಿಕ್ಕನಾಯಕನಹಳ್ಳಿ ತಾಲೂಕಿನ ಹಲವಾರು ಗ್ರಾಮಗಳಲ್ಲಿ ಅಕ್ರಮ ಮರಳು ಗಣಿಗಾರಿಕೆ ಹಾಗೂ ಅಕ್ರಮ ಇಟ್ಟಿಗೆ ಕಾರ್ಖಾನೆಗಳಿಂದ ಸಾಕಷ್ಟು ದುಷ್ಪರಿಣಾಮಗಳು ಆಗುತ್ತಿದ್ದು ಈ ಬಗ್ಗೆ ಗ್ರಾಮಸ್ಥರ ಪರವಾಗಿ ಲಂಚಮುಕ್ತ ನಿರ್ಮಾಣ ವೇದಿಕೆಯ ಜಿಲ್ಲಾ ಕಾರ್ಯದರ್ಶಿ ಭಟ್ಟರಹಳ್ಳಿ ಮಲ್ಲಿಕಾರ್ಜುನ್ ನೀಡಿದ ದೂರಿನ ಮೇರೆಗೆ ಗಣಿ ಮತ್ತು ಭೂ ವಿಜ್ಞಾನ ಇಲಾಖೆಯ ನಾಲ್ಕು ಅಧಿಕಾರಿಗಳ ತಂಡ ರಚನೆಯಾಗಿದ್ದು ಸೋಮವಾರ ಸೆ.3 ರಿಂದ ಮೂರು ದಿನಗಳ ಕಾಲ ಅಧಿಕಾರಿಗಳ ತಂಡ ದೂರುದಾರರ ಸಮ್ಮುಖದಲ್ಲಿ ಸ್ಥಳ ತನಿಖೆ ನಡೆಸಲಿದೆ.

        ಅಕ್ರಮ ಗಣಿಗಾರಿಕೆ ಹಾಗೂ ಅದಕ್ಕೂ ಮೀರಿ ಇಟ್ಟಿಗೆ ಕಾರ್ಖಾನೆಗಳು ಕೆರೆಯನ್ನು ಮಣ್ಣಿಗಾಗಿ ಬಗೆಯುತ್ತಿರುವ ಬಗ್ಗೆ ಧ್ವನಿ ಎತ್ತಿರುವ ಭಟ್ಟರಹಳ್ಳಿ ಮಲ್ಲಿಕಾರ್ಜುನ್ ಈ ಬಗ್ಗೆ ಗಣಿ ಮತ್ತು ಭೂ ವಿಜ್ಞಾನ ಇಲಾಖೆಗೆ ದೂರು ನೀಡಿದ ಹಿನ್ನಲೆಯಲ್ಲಿ ತನಿಖಾತಂಡ ಆಗಮಿಸಲಿದೆ.

ಗಣಿ ಮತ್ತು ಭೂ ವಿಜ್ಞಾನ ಇಲಾಖೆಯ ಪತ್ರ

ದೂರಿನಲ್ಲಿ ಏನಿದೆ: ಹುಳಿಯಾರು ಹೋಬಳಿಯಲ್ಲಿ ಮುನ್ನೂರಕ್ಕೂ ಹೆಚ್ಚು ಇಟ್ಟಿಗೆ ಕಾರ್ಖಾನೆಗಳಿದ್ದು ಇವುಗಳಿಗೆ ಬೇಕಾದ ಕಚ್ಚಾ ವಸ್ತು ಪ್ರಮುಖವಾಗಿ ಮಣ್ಣು.ಈ ಮಣ್ಣನ್ನು ಅಕ್ರಮವಾಗಿ ಕೆರೆ ಕಟ್ಟೆಗಳಿಂದ ಅವೈಜ್ಞಾನಿಕವಾಗಿ ಮನಸೋ ಇಚ್ಛೆ ಕಬಳಿಸುತ್ತಿದ್ದು ಇದರಿಂದ ಪರಿಸರಕ್ಕೆ ಸಾಕಷ್ಟು ಹಾನಿಯಾಗಿದೆ.ಅನೇಕ ಇಟ್ಟಿಗೆ ಫ್ಯಾಕ್ಟರಿಗಳು ಹುಳಿಯಾರು ಕೆರೆಯಲ್ಲಿ ಈ ಹಿಂದೆ ಅಕ್ರಮವಾಗಿ ಕಾರ್ಯನಿರ್ವಹಿಸುತ್ತಿದ್ದು ಅದನ್ನೆಲ್ಲ ನಿಲ್ಲಿಸಿದ್ದರೂ ಸಹ ಕೆರೆಯಿಂದ ಮಣ್ಣನ್ನು ಬಗೆಯುವ ಕೆಲಸ ಮಾತ್ರ ನಿಂತಿಲ್ಲ.ಕೆರೆಮಣ್ಣಿಗೆ ಯಾವುದೇ ರಾಜಧನ ಪಾವತಿಸದೆ ತಮಗೆ ಬೇಕಾದಷ್ಟು ಮಣ್ಣನ್ನು ಬಗೆದು ಫ್ಯಾಕ್ಟರಿಗಳ ಮುಂದೆ ಗುಡ್ಡದ ರೀತಿ ಸಂಗ್ರಹಿಸಿದ್ದಾರೆ.

        ಚಿಕ್ಕನಾಯಕನಹಳ್ಳಿ ತಾಲ್ಲೂಕಿನ ಹುಳಿಯಾರು ಹೋಬಳಿಯ ಭಟ್ಟರಹಳ್ಳಿ ಹಾಗೂ ಕುಪ್ಪೂರು ಕೆರೆಯಲ್ಲಿ ಅಕ್ರಮ ಮರಳುಗಾರಿಕೆ ವರ್ಷಾಂತರದಿಂದ ರಾತ್ರಿಯೆಲ್ಲ ನಡೆಯಿತಿದ್ದು ಈ ಬಗ್ಗೆ ಉಪ ವಿಭಾಗಾಧಿಕಾರಿಗಳು,ತಹಶೀಲ್ದಾರ್,ಜಿಲ್ಲಾ ಗಣಿ ಮತ್ತು ಭೂ ವಿಜ್ಞಾನ ಇಲಾಖೆ ಸೇರಿದಂತೆ ಗ್ರಾಮ ಪಂಚಾಯಿತಿ ಪಿಡಿಒಗಳಿಗೆ ಸಹ ಹಲವು ಬಾರಿ ಮನವಿ ಮಾಡಿದ್ದರು ಗಮನ ಹರಿಸದೆ ನಿರ್ಲಕ್ಷ್ಯ ಮಾಡಿದ್ದಾರೆ. ಕಳೆದ ಒಂದು ವರ್ಷದಿಂದ ಸತತವಾಗಿ ಸಾವಿರಾರು ಲೋಡ್ ಮರಳು ಲೂಟಿಯಾದ ಪರಿಣಾಮ ಈ ಭಾಗದ ತೆಂಗಿನ ತೋಟಗಳು ಅಂತರ್ಜಲ ಹಾಗೂ ತೇವಾಂಶದ ಕೊರತೆಯಿಂದ ನೂರಾರು ಎಕರೆ ತೆಂಗಿನ ತೋಟಗಳು ನಾಶವಾಗಿ ಗೂಟಗಳಿಗೆ ರೈತನ ಜೀವನ ಆತ್ಮಹತ್ಯೆಯ ಹಂತಕ್ಕೆ ತಲುಪಿದೆ.

           ಮರಳು ಹಾಗೂ ಮಣ್ಣನ್ನು ಬೇಕಾಬಿಟ್ಟಿ ಅಗೆಯುತ್ತಿರುವುದರಿಂದ ಇಡೀ ಪರಿಸರದ ಮೇಲೆ,ಅಂತರ್ಜಲದ ಮೇಲೆ ನೇರ ಪರಿಣಾಮವಾಗುತ್ತಿರುವುದರಿಂದ ಮತ್ತು ಇವುಗಳಿಂದ ಹೊರಸೂಸುವ ಹೊಗೆಯೂ ಸಹ ತೆಂಗಿನ ಇಳುವರಿ ಕುಂಠಿತವಾಗಲು ಪರೋಕ್ಷ ಕಾರಣವಾಗಿದೆ.ಈ ರೀತಿಯ ಅಕ್ರಮ ಇಟ್ಟಿಗೆ ಕಾರ್ಖಾನೆಗಳನ್ನು ಯಾವುದೇ ನಿಯಮಗಳಿಗೆ ಒಳಪಡದೆ ಸರ್ಕಾರಕ್ಕೆ ಸಾವಿರಾರು ಕೋಟಿ ನಷ್ಟವನ್ನು ಹಾಗೂ ಪರಿಸರ ಸಮತೋಲನಕ್ಕೆ ಹಾನಿಯನ್ನು ಉಂಟುಮಾಡುತ್ತಿದೆ ಎಂದು ಅವರು ದೂರಿನಲ್ಲಿ ಆರೋಪಿಸಿದ್ದಾರೆ.

       ಈ ಬಗ್ಗೆ ಪತ್ರಿಕೆಯೊಂದಿಗೆ ಮಾತನಾಡಿದ ಅವರು ಹೋಬಳಿ ವ್ಯಾಪ್ತಿಯಲ್ಲಿನ ಅಕ್ರಮ ಮರಳು ಗಣಿಗಾರಿಕೆಯ ತನ್ನ ಕಬಂಧ ಬಾಹುವನ್ನು ಹಳ್ಳಿ ಹಳ್ಳಿಗೂ ವಿಸ್ತರಿಸಿದ್ದು ರಾತ್ರೋರಾತ್ರಿ ಟ್ರ್ಯಾಕ್ಟರ್ ನಲ್ಲಿ ಮರಳು ಸಾಗಾಟವಾಗುತ್ತಿದ್ದರೂ ಸಹ ಪೊಲೀಸ್ ಇಲಾಖೆ ಹಾಗೂ ಸಣ್ಣ ನೀರಾವರಿ ಇಲಾಖೆ ಮೌನವಾಗಿದೆ.ಗ್ರಾಮಸ್ಥರುಗಳು ಸಹ ತಮ್ಮೆದುರಿಗೆ ಅಕ್ರಮ ಗಣಿಗಾರಿಕೆ ನಡೆಯುತ್ತಿದ್ದರೂ ಸಹ ಮೌನವಾಗಿರುವುದು ಇವುಗಳಿಗೆ ಇಂಬು ಕೊಟ್ಟಂತಿದೆ ಎಂದರು.

ಅಕ್ರಮ ಮರಳುಗಾರಿಕೆಯಿಂದ ಹಾಳಾಗಿರುವ ಭಟ್ಟರಹಳ್ಳಿಯ ಕೆರೆ 

          ತಾಲೂಕಿನಾದ್ಯಂತ ನಡೆಯುತ್ತಿರುವ ಇಟ್ಟಿಗೆ ಕಾರ್ಖಾನೆಗಳು ಯಾವುದೇ ನಿಯಮ ಬದ್ಧವಾಗಿ ನಡೆಯುತ್ತಿಲ್ಲ .ಎಲ್ಲವೂ ಕೃಷಿ ಭೂಮಿಯಲ್ಲಿ ನಡೆಯುತ್ತಿದ್ದು,ಈ ಹಿಂದೆ ಒಮ್ಮೆ ನೋಟಿಸ್ ಜಾರಿ ಮಾಡಿದ್ದರೂ ಸಹ ಈ ಬಗ್ಗೆ ಮತ್ತೆ ಅಧಿಕಾರಿಗಳು ಮೌನಕ್ಕೆ ಶರಣಾಗಿದ್ದಾರೆ.ಯಾವೊಂದು ಇಟ್ಟಿಗೆ ಕಾರ್ಖಾನೆಗಳು ಸಹ ಸರ್ಕಾರಕ್ಕೆ ತೆರಿಗೆಯನ್ನು ಪಾವತಿಸುತ್ತಿಲ್ಲ.ರಾಜಾರೋಷವಾಗಿ ಅಕ್ರಮವಾಗಿ ದಂಧೆ ನಡೆಸುತ್ತಾ ಬಂದಿದ್ದಾರೆ.ಎಲ್ಲ ಕೆರೆಗಳಲ್ಲೂ ಸಾಕಷ್ಟು ಮರಳನ್ನು ಬಗೆದು ತೆಗೆದಿರುವುದರಿಂದ ಕೆರೆ ಕಟ್ಟೆಗಳು ಬಾವಿಯಂತಾಗಿದೆ.ನೀರಿನ ಸಂಗ್ರಹ ಮಾಡುವ ಶಕ್ತಿ ಕಳೆದುಕೊಂಡಿದೆ ಇದರಿಂದಾಗಿ ಕಲ್ಪತರು ನಾಡಿನ ತೆಂಗಿನ ನಾಶವಾಗುತ್ತಾ ಸಾಗುತ್ತಿದೆ.ಹೀಗಾಗಿ ರೈತರ ಅಳುವಿನ ಅಳಿವು ಉಳಿವಿನ ಪ್ರಶ್ನೆ ಎದುರಾಗಿದ್ದು ಮರಳು ದಂಧೆಯ ಹಾಗೂ ಇಟ್ಟಿಗೆ ಕಾರ್ಖಾನೆ ವಿರುದ್ಧ ಧ್ವನಿ ಎತ್ತುವ ಅನಿವಾರ್ಯತೆ ಕಂಡು ಬಂದಿದೆ ಎಂದರು.

           ಇಂತಹ ವ್ಯವಸ್ಥಿತ ಸಂಚಿನ ರೂವಾರಿಗಳ ಬಗ್ಗೆ, ಕರ್ತವ್ಯ ಲೋಪ ಎಸಗಿರುವ ಸಂಬಂಧಿಸಿದ ಅಧಿಕಾರಿಗಳ ಬಗ್ಗೆ ಕ್ರಮಕೈಗೊಳ್ಳುವಂತೆ ಹಾಗೂ ಇಡೀ ತಾಲ್ಲೂಕಿನಲ್ಲಿ ಆಗಿರುವ ಮರಳುಗಾರಿಕೆಯ ಬಗ್ಗೆ ವೈಜ್ಞಾನಿಕವಾಗಿ ತನಿಖೆ ಮಾಡಲು ತಜ್ಞರ ತಂಡವನ್ನು ರಚಿಸಿ ಹಾಳಾಗಿರುವ ಪರಿಸರ ಸಮತೋಲನಕ್ಕೆ ಸೂಕ್ತ ಕ್ರಮ ಕೈಗೊಳ್ಳುವಂತೆ ಅವರು ಆಗ್ರಹಿಸಿದ್ದಾರೆ.

-----------------------------------

ಇಟ್ಟಿಗೆ ಸುಡಲು ಸಾಕಷ್ಟು ಸೌದೆ ಸಹ ಬೇಕಾಗಿದ್ದು ಎಲ್ಲೆಂದರಲ್ಲಿ ಕಾಡುಗಳನ್ನು ಕಡಿದು ರಾತ್ರೋರಾತ್ರಿ ಟ್ರ್ಯಾಕ್ಟರಿನಲ್ಲಿ ಸೌದೆಗಳನ್ನು ಇಟ್ಟಿಗೆ ಕಾರ್ಖಾನೆಗೆ ಮಾರುವ ವ್ಯವಸ್ಥೆಯ ವ್ಯಾಪಕವಾದ ಜಾಲ ಹಬ್ಬಿದ್ದು ಈ ಬಗ್ಗೆ ಎಲ್ಲಾ ತಿಳಿದಿದ್ದರೂ ಸಹ ಅರಣ್ಯ ಇಲಾಖೆ ಅಧಿಕಾರಿಗಳು ಮೌನವಾಗಿದ್ದಾರೆ.

--------------------------------

ಸೋಮವಾರ ಆಗಮಿಸಲಿರುವ ತಂಡದಲ್ಲಿ ಗಣಿ ಮತ್ತು ಭೂ ವಿಜ್ಞಾನ ಇಲಾಖೆಯ ಉಮಾಶಂಕರ್,ಲೋಕೇಶ್,ಇಲಾಖೆಯ ಎಂಜಿನಿಯರ್ ಗಳು ಗಣಿ ಮತ್ತು ಭೂ ವಿಜ್ಞಾನ ಇಲಾಖೆಯ ತುಮಕೂರು ಜಿಲ್ಲೆಯ ಉಪ ನಿರ್ದೇಶಕ ಮಹಾಂತೇಶ್ ಇದ್ದಾರೆ. ಈ ಅಧಿಕಾರಿಗಳ ತಂಡವು ದೂರುದಾರರ ಸಮ್ಮುಖದಲ್ಲಿ ಅಕ್ರಮ ಮರಳು ಗಣಿಗಾರಿಕೆ ಪ್ರದೇಶ ಹಾಗೂ ಇಟ್ಟಿಗೆ ಕಾರ್ಖಾನೆಗಳಿರುವ ಪ್ರದೇಶಗಳ ಸ್ಥಳ ತನಿಖೆ ನಡೆಸಲಿದೆ.ರೈತರು,ಸಾರ್ವಜನಿಕರು ಆಯಾ ಗ್ರಾಮಗಳಲ್ಲಿ ನಡೆಯುತ್ತಿರುವ ಅಕ್ರಮಗಳ ಬಗ್ಗೆ ತಂಡಕ್ಕೆ ವಿವರಿಸಬೇಕು.ಪ್ರತಿಯೊಂದನ್ನು ವಿಡಿಯೊ ಚಿತ್ರೀಕರಣ ಮಾಡಿಕೊಳ್ಳಲಾಗುವುದು. ಈ ಅಭಿಯಾನಕ್ಕೆ ಗ್ರಾಮದ ಸರ್ವರು ಕೈ ಜೋಡಿಸಿ ಸಮಸ್ಯೆಯ ಬಗ್ಗೆ ಅಧಿಕಾರಿಗಳಿಗೆ ತಿಳಿಸಬೇಕು.:ಭಟ್ಟರಹಳ್ಳಿ ಮಲ್ಲಿಕಾರ್ಜುನ್,ಲಂಚ ಮುಕ್ತ ಕರ್ನಾಟಕ ನಿರ್ಮಾಣ ವೇದಿಕೆಯ ಜಿಲ್ಲಾ ಸಂಘಟನಾ ಕಾರ್ಯದರ್ಶಿ

----------------------------------------