ಹುಳಿಯಾರಿನಲ್ಲಿ ಕಸದ ಸಮಸ್ಯೆ ಬಿಕ್ಕಟ್ಟು : ವಾಹನಗಳಿದ್ದರೂ ಚಾಲಕರಿಲ್ಲ, ಸ್ಥಳ ಗುರ್ತಿಸಿದರೂ ಅರಣ್ಯ ಇಲಾಖೆಯಿಂದ ಆಕ್ಷೇಪ
---------------------------------------------
ಹುಳಿಯಾರು: ತಾಲ್ಲೂಕಿನ ಪ್ರಮುಖ ಪಟ್ಟಣವಾದ ಹುಳಿಯಾರಿನಲ್ಲಿ ಕಸ ವಿಲೇವಾರಿ ಸಮಸ್ಯೆ ದಿನೇ ದಿನೇ ತೀವ್ರಗೊಳ್ಳುತ್ತಿದ್ದು, ಅಧಿಕಾರಿಗಳ ನಿರ್ಲಕ್ಷ್ಯ ಮತ್ತು ಕಾನೂನು ತೊಡಕುಗಳಿಂದಾಗಿ ಈ ಸಮಸ್ಯೆ ಇನ್ನಷ್ಟು ಜಟಿಲವಾಗಿದೆ. ಕಸ ವಿಲೇವಾರಿಗೆಂದು ಲಕ್ಷಾಂತರ ರೂಪಾಯಿ ವೆಚ್ಚದಲ್ಲಿ ಖರೀದಿಸಿರುವ ವಾಹನಗಳು ಮೂಲೆ ಸೇರಿದ್ದರೆ, ಕಸ ವಿಲೇವಾರಿ ಘಟಕಕ್ಕೆಂದು ಗುರುತಿಸಲಾದ ಸ್ಥಳವು ಇದೀಗ ಅರಣ್ಯ ಇಲಾಖೆಯ ವ್ಯಾಪ್ತಿಯಲ್ಲಿದೆ ಎಂದು ತಿಳಿದುಬಂದಿದೆ. ಈ ಬೆಳವಣಿಗೆಗಳು, ಹುಳಿಯಾರು ಪಟ್ಟಣದ ಬಹುಕಾಲದ ಕಸವಿಲೇವಾರಿ ಸಮಸ್ಯೆಯನ್ನು ಮತ್ತಷ್ಟು ಸಂಕೀರ್ಣಗೊಳಿಸಿವೆ.
-----------
ಪಟ್ಟಣ ಪಂಚಾಯಿತಿ ಕಸ ವಿಲೇವಾರಿಗಾಗಿ ಹಲವು ತಿಂಗಳ ಹಿಂದೆಯೇ ಹೊಸ ವಾಹನಗಳನ್ನು ಖರೀದಿಸಿದೆ. ಇದರಲ್ಲಿ ಕಸ ಸಂಗ್ರಹದ ಆಟೋಗಳು ಮತ್ತು ತ್ಯಾಜ್ಯ ಲೋಡ್ ಮಾಡಲು ಎಕ್ಸ್ಕವೇಟರ್ (ಬಾಬ್ಕ್ಯಾಟ್) ಸಹ ಸೇರಿವೆ. ಆದರೆ, ಈ ವಾಹನಗಳನ್ನು ನಿರ್ವಹಿಸಲು ಇದುವರೆಗೆ ಚಾಲಕರನ್ನು ನೇಮಕ ಮಾಡಿಕೊಳ್ಳದಿರುವುದು ವಿಪರ್ಯಾಸ. ಪರಿಣಾಮವಾಗಿ, ಈ ದುಬಾರಿ ವಾಹನಗಳು ಪಟ್ಟಣ ಪಂಚಾಯಿತಿ ಕಚೇರಿ ಆವರಣದಲ್ಲೇ ಧೂಳು ಹಿಡಿದು ನಿಂತಿವೆ. ಕಸದ ಸಮಸ್ಯೆ ವಿಪರೀತವಾಗಿದ್ದರೂ, ವಾಹನಗಳಿದ್ದರೂ ಚಾಲಕರಿಲ್ಲದೆ, ನಿಗದಿತ ಅವಧಿಯೊಳಗೆ ಸರ್ವೀಸ್ ಮಾಡಿಸದೇ ಸುಸ್ಥಿತಿಯಲ್ಲಿದೆಯೋ ಇಲ್ಲವೋ ಎಂಬುದೂ ತಿಳಿಯದೇ ನಿಂತಲ್ಲೇ ಹಾಳಾಗುತ್ತಿರುವ ಈ ವಾಹನಗಳು ಪಂಚಾಯಿತಿಗೆ ಅನಗತ್ಯ ಆರ್ಥಿಕ ಹೊರೆಯಾಗಿ ಪರಿಣಮಿಸಿವೆ.
ಕಸ ವಿಲೇವಾರಿ ಸ್ಥಳದ ಗೊಂದಲ:
------------------
ಚಾಲಕರ ನೇಮಕಾತಿ ಸಮಸ್ಯೆ ಒಂದು ಕಡೆಯಾದರೆ, ಕಸ ವಿಲೇವಾರಿಗೆ ಶಾಶ್ವತ ಸ್ಥಳದ ಕೊರತೆ ಇನ್ನೊಂದು ದೊಡ್ಡ ಸಮಸ್ಯೆಯಾಗಿ ಪರಿಣಮಿಸಿದೆ. ಪಟ್ಟಣ ಪಂಚಾಯಿತಿಯಾಗಿ ಏಳು ವರ್ಷಗಳು ಕಳೆದರೂ, ಇದುವರೆಗೆ ಒಂದು ಘನ ತ್ಯಾಜ್ಯ ವಿಲೇವಾರಿ ಘಟಕವನ್ನು ಸ್ಥಾಪಿಸಲು ಸಾಧ್ಯವಾಗಿಲ್ಲ. ಇತ್ತೀಚೆಗೆ, ಜಿಲ್ಲಾಡಳಿತ ಈ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳುವ ನಿಟ್ಟಿನಲ್ಲಿ ಯಗಚೀಹಳ್ಳಿ ಗ್ರಾಮದ ಸರ್ವೆ ನಂ. 25 ರಲ್ಲಿರುವ 4-10 ಎಕರೆ ಸರ್ಕಾರಿ ಜಮೀನನ್ನು ಕಸ ವಿಲೇವಾರಿ ಘಟಕಕ್ಕೆ ಮೀಸಲಿಡಲು ಯೋಚಿಸಿತ್ತು. ಆದರೆ, ಈ ಬಗ್ಗೆ ಅರಣ್ಯ ಇಲಾಖೆಯಿಂದ ಮಾಹಿತಿ ಕೋರಿದಾಗ, ಬುಕ್ಕಾಪಟ್ಟಣ ಪ್ರಾದೇಶಿಕ ಅರಣ್ಯ ವಲಯವು ನೀಡಿದ ವರದಿಯು ಎಲ್ಲರನ್ನೂ ನಿರಾಸೆಗೊಳಿಸಿದೆ.
ವರದಿಯ ಪ್ರಕಾರ, ಯಗಚೇಹಳ್ಳಿ ಗ್ರಾಮದ ಸರ್ವೆ ನಂ. 25, ಒಟ್ಟಾರೆ 751.57 ಹೆಕ್ಟೇರ್ ಪ್ರದೇಶವು ಯಗಚೀಹಳ್ಳಿ ಗ್ರಾಮ ಅರಣ್ಯ ಪ್ರದೇಶದ ವ್ಯಾಪ್ತಿಗೆ ಒಳಪಟ್ಟಿದೆ. ಈ ವರದಿಯು, ಕಸ ವಿಲೇವಾರಿ ಘಟಕಕ್ಕೆ ಗುರುತಿಸಲಾಗಿದ್ದ ಜಮೀನು ಕಾನೂನುಬದ್ಧವಾಗಿ ಅರಣ್ಯ ಇಲಾಖೆಗೆ ಸೇರಿದ್ದರಿಂದ ಅದರ ಹಸ್ತಾಂತರ ಸಾಧ್ಯವಿಲ್ಲ ಎಂಬ ಗೊಂದಲಕ್ಕೆ ಕಾರಣವಾಗಿದೆ.
ಆರ್ಥಿಕ ನಷ್ಟ ಹಾಗೂ ನಾಗರಿಕರ ಸಂಕಷ್ಟ:
------------------
ಸದ್ಯ, ಪಟ್ಟಣದ ಕಸವನ್ನು ಸುಮಾರು 25 ಕಿ.ಮೀ ದೂರದ ಚಿಕ್ಕನಾಯಕನಹಳ್ಳಿಯಲ್ಲಿರುವ ಘನ ತ್ಯಾಜ್ಯ ವಿಲೇವಾರಿ ಘಟಕಕ್ಕೆ ಸಾಗಿಸಲಾಗುತ್ತಿದೆ. ಇದು ಕೇವಲ ಇಂಧನ ಮತ್ತು ಸಮಯದ ನಷ್ಟಕ್ಕೆ ಕಾರಣವಾಗದೆ, ಪಟ್ಟಣ ಪಂಚಾಯಿತಿಗೆ ತಿಂಗಳಿಗೆ ಲಕ್ಷಾಂತರ ರೂಪಾಯಿ ಆರ್ಥಿಕ ಹೊರೆಯನ್ನೂ ಉಂಟುಮಾಡುತ್ತಿದೆ. ಇದೇ ರೀತಿ, ಸಮೀಪದ ದಸೂಡಿಯಲ್ಲಿ ಗುರ್ತಿಸಲಾಗಿದ್ದ ಕಸ ವಿಲೇವಾರಿಗೂ 25 ಕಿ.ಮೀ ದೂರ ಪ್ರಯಾಣಿಸಬೇಕಿದೆ. ಹೀಗಾಗಿ, ಇಂಧನ ಮತ್ತು ನಿರ್ವಹಣಾ ವೆಚ್ಚಗಳು ಹೆಚ್ಚುತ್ತಿವೆ.
ಕಸವಿಲೇವಾರಿ ಬಗ್ಗೆ ಪಂಚಾಯಿತಿಯು ತೀವ್ರವಾಗಿ ಗಮನ ಕೊಡದಿರುವುದು ಮತ್ತು ಸ್ಥಳದ ಕೊರತೆಯಿಂದಾಗಿ ಪಟ್ಟಣದಲ್ಲಿ ಕಸದ ಸಂಗ್ರಹ ಸಮರ್ಪಕವಾಗಿ ನಡೆಯದೆ ರಸ್ತೆ ಬದಿಗಳಲ್ಲಿ ಮತ್ತು ಸಾರ್ವಜನಿಕ ಸ್ಥಳಗಳಲ್ಲಿ ಕಸದ ರಾಶಿಗಳು ತುಂಬಿ, ವಾತಾವರಣವು ದುರ್ನಾತದಿಂದ ಕೂಡಿ ಸ್ಥಳೀಯರಿಗೆ ಅನಾರೋಗ್ಯದ ಭಯವನ್ನು ಉಂಟುಮಾಡುತ್ತಿದೆ.
ಜಿಲ್ಲಾಡಳಿತದ ತುರ್ತು ಗಮನ ಅಗತ್ಯ:
-------------------
ಈ ಎಲ್ಲಾ ಸಮಸ್ಯೆಗಳಿಗೆ ತಕ್ಷಣವೇ ಪರಿಹಾರ ಕಂಡುಕೊಳ್ಳುವುದು ಅನಿವಾರ್ಯವಾಗಿದ್ದು ಜಿಲ್ಲಾಡಳಿತ ಈ ಬಗ್ಗೆ ತುರ್ತಾಗಿ ಗಮನ ಹರಿಸಬೇಕಿದೆ. ಮೊದಲಿಗೆ, ಯಾವುದೇ ಕಾನೂನು ತೊಡಕುಗಳಿಲ್ಲದ, ಜನವಸತಿ ಮತ್ತು ಅರಣ್ಯ ಪ್ರದೇಶಗಳಿಂದ ಹೊರತಾದ ಸೂಕ್ತವಾದ ಸ್ಥಳವನ್ನು ಹುಳಿಯಾರು ಪಟ್ಟಣದ ಆಸುಪಾಸಿನಲ್ಲಿಯೇ ಕಂದಾಯ ಇಲಾಖೆಯ ಸಹಕಾರದೊಂದಿಗೆ ಗುರುತಿಸಿ, ಅದನ್ನು ಪಟ್ಟಣ ಪಂಚಾಯಿತಿಗೆ ಹಸ್ತಾಂತರಿಸಬೇಕಿದೆ. ಅಲ್ಲದೇ, ಕಸದ ವಾಹನಗಳನ್ನು ಸುವ್ಯವಸ್ಥಿತವಾಗಿ ನಿರ್ವಹಿಸಲು ಅಗತ್ಯವಿರುವ ಚಾಲಕರ ನೇಮಕಾತಿ ಪ್ರಕ್ರಿಯೆಯನ್ನು ಆದ್ಯತೆಯ ಮೇಲೆ ಪೂರ್ಣಗೊಳಿಸಬೇಕಿದೆ.
ಪಟ್ಟಣ ಪಂಚಾಯಿತಿಯಾಗಿ ಏಳು ವರ್ಷಗಳು ಕಳೆದರೂ, ಇದುವರೆಗೆ ಒಂದು ಶಾಶ್ವತವಾದ ಕಸ ವಿಲೇವಾರಿ ಘಟಕವನ್ನು ಸ್ಥಾಪಿಸದಿರುವುದು ಅಧಿಕಾರಿಗಳ ಮತ್ತು ಜನಪ್ರತಿನಿಧಿಗಳ ನಿರ್ಲಕ್ಷ್ಯಕ್ಕೆ ಹಿಡಿದ ಕನ್ನಡಿಯಾಗಿದ್ದು,ಅಧಿಕಾರಿಗಳು ಕೇವಲ ಆಡಳಿತಾತ್ಮಕ ಪತ್ರ ವ್ಯವಹಾರಗಳಿಗೆ ಸೀಮಿತವಾಗದೆ, ನಿಜವಾದ ಪರಿಹಾರಕ್ಕಾಗಿ ವಾಸ್ತವಿಕ ಕ್ರಮಗಳನ್ನು ಕೈಗೊಳ್ಳಬೇಕಾಗಿದೆ. ಇಲ್ಲವಾದರೆ, "ಸ್ವಚ್ಛ ಭಾರತ"ದ ಕನಸು ಹುಳಿಯಾರಿನಲ್ಲಿ ಕಾಗದದ ಮೇಲೆ ಮಾತ್ರ ಉಳಿದು, ನಾಗರಿಕರು ಮಾತ್ರ ಕಸದ ಸಮಸ್ಯೆಗಳ ಸುಳಿಯಲ್ಲಿ ಸಿಕ್ಕಿಹಾಕಿಕೊಳ್ಳಬೇಕಾಗುತ್ತದೆ. ಜಿಲ್ಲಾಡಳಿತದ ದಿಟ್ಟ ಕ್ರಮಕ್ಕಾಗಿ ಪಟ್ಟಣದ ಜನರು ಕಾತರದಿಂದ ಕಾಯುತ್ತಿದ್ದಾರೆ.
ಕಾಮೆಂಟ್ಗಳು
ಕಾಮೆಂಟ್ ಪೋಸ್ಟ್ ಮಾಡಿ