ಮದರಸ ವಿಚಾರವಾಗಿ ಒಂದೇ ಕೋಮಿನ ಎರಡು ಪಂಗಡಗಳ ನಡುವೆ ಘರ್ಷಣೆ----------------------------------------
ವಾಹನಕ್ಕೆ ಕಲ್ಲು: ಹಲವರಿಗೆ ಗಾಯ
---------------------
ಮದರಸ ನಡೆಸುತ್ತಿರುವವರು ಒಂದು ಪಂಗಡದ ಧಾರ್ಮಿಕ ಆಚರಣೆ ವಿರುದ್ಧ ಎತ್ತಿಕಟ್ಟುತ್ತಿದ್ದಾರೆ ಎಂದು ಅದೇ ಕೋಮಿನ ಮತ್ತೊಂದು ಪಂಗಡ ಆರೋಪಿಸಿ ಈ ವಿಚಾರವಾಗಿ ನಡೆದ ವಾಗ್ವಾದ ವಿಕೋಪಕ್ಕೆ ತಿರುಗಿ ಎರಡೂ ಪಂಗಡಗಳ ನಡುವೆ ಘರ್ಷಣೆ ನಡೆದು ಒಂದು ಕ್ವಾಲೀಸ್ ವಾಹನದ ಗಾಜು ಪುಡಿಪುಡಿಯಾಗಿ ಎರಡು ಬಣಗಳ ಹಲವು ಮಂದಿಗೆ ಗಾಯಗಳಾದ ಘಟನೆ ಹುಳಿಯಾರಿನಲ್ಲಿ ಭಾನುವಾರ ಜರುಗಿದೆ.ಘಟನೆ ವಿವರ: ಇಲ್ಲಿನ ಹಳೇ ಅಂಚೆ ಕಛೇರಿ ಹಿಂಭಾಗದಲ್ಲಿರುವ ಇಂದಿರಾನಗರದ ಮನೆಯೊಂದರಲ್ಲಿ ಮುಸ್ಲಿಂ ಸಮುದಾಯಕ್ಕೆ ಸೇರಿದ ತಬ್ಲಿಕ್ ಪಂಗಡದವರು ಮದರಸ ಆರಂಭಿಸಿದ್ದು ಇವರುಗಳು ಬಹುಸಂಖ್ಯಾತ ಸುನ್ನಿ ಪಂಗಡದ ಬಡ ಮಕ್ಕಳಿಗೆ ಆಮಿಷವೊಡ್ಡಿ ಸುನ್ನಿ ಧರ್ಮ ಪದ್ಧತಿ ಹಾಗೂ ಪಾಲನೆ ವಿರುದ್ದ ಅಪಪ್ರಚಾರ ಮಾಡುತ್ತಿದ್ದಾರೆಂದು ಆರೋಪಿಸಿದ ಸುನ್ನಿ ಪಂಗಡದ ಕೆಲ ಯುವಕರು ಮದರಸ ನಡೆಸುವುದನ್ನು ತಡೆಯಲು ಹೋಗಿದ್ದೆ ಈ ಘಟನೆ ನಡೆಯಲು ಕಾರಣ ಎನ್ನಲಾಗಿದೆ.
ತಬ್ಲಿಕ್ ಪಂಗಡದವರು ಹೇಳುವುದಿಷ್ಟು : ಹಜರತ್ ದಿಲಾಲ್ ಟ್ರಸ್ಟ್ ಅಡಿಯಲ್ಲಿ ತಬ್ಲಿಕ್ ಪಂಗಡದವರು ಮದರಸ ನಡೆಸುತ್ತಿದ್ದು ಇಲ್ಲಿ ಕುರಾನ್ ಪಠಣ ಹಾಗೂ ನಮಾಝ್ ಕ್ರಮ ಕಲಿಸಿಕೊಡಲಾಗುತ್ತಿದೆ. ಅಲ್ಲದೆ ಕಳೆದ ವರ್ಷದಿಂದ ಈ ಭಾಗದ 3 ಮಸೀದಿಗಳಿಗೆ ನಿರಂತರವಾಗಿ ದೇಣಿಗೆ ನೀಡುತ್ತ ಸಮುದಾಯದ ಎಲ್ಲ ಕಾರ್ಯಗಳಿಗೆ ಬೆನ್ನೆಲುಬಾಗಿ ನಿಂತಿದ್ದೇವೆ. ಇಂದು ಮದರಸದ ಉದ್ಘಾಟನೆ ನಿಮಿತ್ತ ಹೊರಗಡೆಯಿಂದ ಧರ್ಮಗುರುಗಳನ್ನು ಕರೆಸಿ ಪೂರ್ವಭಾವಿ ಸಭೆ ನಡೆಸುತ್ತಿರುವ ಸಮಯದಲ್ಲಿ ಇದನ್ನು ತಪ್ಪಾಗಿ ತಿಳಿದ ಸುನ್ನಿ ಪಂಗಡದ ಕೆಲವರು ಏಕಾಏಕಿ ಗಲಾಟೆ ಬಂದಿದ್ದು ಈ ಸಂಘರ್ಷಕ್ಕೆ ಆಸ್ಪದವಾಗಿದೆ ಎಂದರು.
ಸುನ್ನಿ ಪಂಗಡದವರು ಹೇಳಿದ್ದು: ಹೊಸ ಮದರಸ ಆರಂಭಿಸ ಬೇಕಾದರೆ 3 ಮಸೀದಿಗಳ ಅನುಮತಿ ಮುಖ್ಯವಾಗಿದ್ದು ಇದುವರೆವಿಗೂ ಯಾವುದೇ ಅನುಮತಿ ಪಡೆದಿಲ್ಲ. ಅಲ್ಲದೆ, ಈಗಾಗಲೇ ಇಲ್ಲಿ 3 ಮದರಸಗಳಿದ್ದು ಮತ್ತೊಂದು ಮದರಸದ ಅಗತ್ಯವಿಲ್ಲ. ಇಲ್ಲಿ ಧರ್ಮ ಪರಿಪಾಲನೆ ತಿಳಿಸುವ ಬದಲು ನಮ್ಮದೇ ಧರ್ಮದ ವಿರುದ್ದ ಅಪಪ್ರಚಾರ ನಡೆಸಲಾಗುತ್ತಿದೆ. ಹಣ ಹಾಗೂ ಬಾಡೂಟದ ಆಮೀಷ ತೋರಿಸಿ ಮಕ್ಕಳನ್ನು ಸೆಳೆಯಲಾಗುತ್ತಿದೆ ಎಂದು ಆರೋಪಿಸಿದರು. ಹಣದ ರುಚಿ ಕಂಡವರು ಮುಂದೆ ಹಣಗಳಿಸಲು ಅಕ್ರಮ ಚಟುವಟಿಕೆಗಳಲ್ಲಿ ತೊಡಗಿ ಉಗ್ರವಾದಿ, ಬಯೋತ್ಪಾದಕರಾಗಿ ಮಾರ್ಪಟ್ಟು ಹಿಂದು ಮುಸ್ಲಿಮರ ಸೌಹಾರ್ದತೆಯ ಸಹಬಾಳ್ವೆಗೆ ಮಾರಕವಾಗಬಹುದಾದ ಆತಂಕ ವ್ಯಕ್ತಪಡಿಸಿದರು.
ಪರಿಸ್ಥಿತಿ ವಿಕೋಪ: ಈ ಬಗ್ಗೆ ಸುನ್ನಿ ಪಂಗಡದವರು ಹಲವಾರು ಬಾರಿ ಎಚ್ಚರಿಕೆ ನೀಡಿದಾಗ್ಯೂ ಇದನ್ನು ಲೆಖ್ಖಿಸದೆ ಇಂದು ಸಹ ಸಭೆ ನಡೆಸುತ್ತಿದ್ದರಿಂದ ಸಭೆ ನಿಲ್ಲಿಸಲು ಹೋದಾಗ ಈ ಎರಡು ಪಂಗಡಗಳ ನಡುವೆ ಮಾರಾಮಾರಿ ಘರ್ಷಣೆಗೆ ಕಾರಣವಾಯಿತು. ಪರಿಸ್ಥಿತಿ ವಿಕೋಪಕ್ಕೆ ತಿರುಗಿ ಮದರಸದ ಆಚೆ ನಿಂತಿದ್ದ ಸ್ಕಾರ್ಪಿಯೋ ವಾಹನಕ್ಕೆ ಕಲ್ಲು ಬೀಸಿದ್ದರಿಂದ ಗಾಜು ಪುಡಿಪುಡಿಯಾಯಿತು. ಎರಡು ಗುಂಪುಗಳ ನಡುವೆ ಕೈಕೈ ಮಿಲಾಯಿಸಿ ಹಲವು ಮಂದಿಗೆ ಸಣ್ಣಪುಟ್ಟ ಗಾಯಗಳಾಗಿವೆ. ವಿಷಯ ತಿಳಿದ ಪಿಎಸ್ಐ ಪಾರ್ವತಿ ಯಾದವ್ ಅವರು ಘಟನಾ ಸ್ಥಳಕ್ಕೆ ಧಾವಿಸಿ ಬಂದು ಪರಿಸ್ಥಿತಿಯನ್ನು ಹತೋಟಿಕೆ ತಂದರು. ಗಲಾಟೆಯಲ್ಲಿ ತೊಡಗಿದ್ದ ಎರಡು ಗುಂಪಿನವರನ್ನು ಪೊಲೀಸ್ ಠಾಣೆಗೆ ಕರೆದೊಯ್ದರು. ಘಟನಾ ಸ್ಥಳಕ್ಕೆ ಆಗಮಿಸಿದ್ದ ಚಿ.ನಾ.ಹಳ್ಳಿ ಸಿಪಿಐ ರವಿಪ್ರಸಾದ್ ಪರಿಸ್ಥಿತಿ ನಿಯಂತ್ರಿಸಲು ಶಿರಾ ಹಾಗೂ ಚಿ.ನಾ.ಹಳ್ಳಿಯಿಂದ ಹೆಚ್ಚಿನ ಸಿಬ್ಬಂದಿ ಕರೆಸಿದರು. ಎರಡು ಗುಂಪುಗಳ ಮುಖಂಡರ ಜೊತೆ ಠಾಣೆಯಲ್ಲಿ ಶಾಂತಿ ಸಭ ಏರ್ಪಡಿಸಿದರು. ಶಾಂತಿ ಸಭೆ ನಡೆಯುವ ಸಮಯದಲ್ಲೇ ಸಿಪಿಐ ಮುಂದೆಯೇ ಎರಡು ಗುಂಪುಗಳ ಮಧ್ಯೆ ಏರಿದ ಧ್ವನಿಯಲ್ಲಿ ವಾಗ್ವಾದ ನಡೆದು ಒಬ್ಬರಿಗೊಬ್ಬರು ತಳ್ಳಾಡಿ ಕೈಕೈ ಮಿಲಾಯಿಸುವ ಹಂತಕ್ಕೆ ತಲುಪಿದ್ದರಿಂದ ಇಬ್ಬರಿಗೂ ತಿಳಿಹೇಳಿ ಅವರವರ ಧರ್ಮದ ಆಚರಣೆಗೆ ತೊಡಕು ಮಾಡುವುದು ಅಪರಾದವಾಗುತ್ತದೆಯಲ್ಲದೆ ಹೊರಗಡೆಯಿಂದ ಗುರುಗಳನ್ನು ಕರೆಸಿ ಸಾರ್ವಜನಿಕ ಸಭೆ, ಸಮಾರಂಭ ನಡೆಸುವಾಗ ಪೊಲೀಸರ ಪೂರ್ವಾನುಮತಿ ಪಡೆಯಬೇಕು ಎಂದು ಒಪ್ಪಿಗೆ ಪತ್ರಕ್ಕೆ ಸಹಿ ಹಾಕಿಸಿಕೊಂಡು ವಿವಾದಕ್ಕೆ ತೆರೆಎಳೆದರು.
ಕಾಮೆಂಟ್‌ಗಳು
ಕಾಮೆಂಟ್‌ ಪೋಸ್ಟ್‌ ಮಾಡಿ