ಹುಳಿಯಾರು:ಅಂತ್ಯಸಂಸ್ಕಾರಕ್ಕೆ ಹಿಂದೂ ರುದ್ರಭೂಮಿಗೆ ಸ್ಥಳ ಗುರುತಿಸಲು ಹನುಮಂತಯ್ಯ ಮನವಿ

ಹುಳಿಯಾರು ಟೌನ್‌ನಲ್ಲಿ ಸರಿಸುಮಾರು 30 ಸಾವಿರದಷ್ಟು ಜನಸಂಖ್ಯೆಯಿದ್ದು, ಗ್ರಾಮ ಪಂಚಾಯಿತಿಯಿಂದ ಪಟ್ಟಣ ಪಂಚಾಯಿತಿಯಾಗಿ ಮೇಲ್ದರ್ಜೆಗೆ ಏರಿದೆ.ಎಲ್ಲಾ ಸೌಲಭ್ಯಗಳು ಆಗುತ್ತಿದ್ದರು ಸಹ ಮೃತಪಟ್ಟ ಸಮಯದಲ್ಲಿ ಅಂತ್ಯಸಂಸ್ಕಾರಕ್ಕೆ ಬೇಕಾಗಿರುವ ರುದ್ರಭೂಮಿಯ ಬಗ್ಗೆ ಯಾರೊಬ್ಬರೂ ಗಮನಹರಿಸಿಲ್ಲ. ಇಷ್ಟು ಜನಸಂಖ್ಯೆಗೆ ರುದ್ರಭೂಮಿ ಅತಿ ಅಗತ್ಯವಿದ್ದು, ಇದಕ್ಕಾಗಿ ಎಲ್ಲರಿಗೂ ಅನುಕೂಲವಾಗುವ ಸ್ಥಳದಲ್ಲಿ ಸರ್ಕಾರಿ ಜಾಗದಲ್ಲಿಯಾದರೂ ಸರಿ ಅಥವಾ ಖಾಸಗಿಯವರಿಂದ ಭೂಮಿ ಕೊಂಡಾದರೂ ಸರಿ ಹಿಂದು ರುದ್ರಭೂಮಿ ಗುರುತಿಸುವಂತೆ ಕರ್ನಾಟಕ ದಲಿತ ಸಹಾಯವಾಣಿಯ ಅಧ್ಯಕ್ಷ ಹೊಸಳ್ಳಿ ಹನುಮಂತಯ್ಯ ಪಟ್ಟಣ ಪಂಚಾಯಿತಿ ಅಧ್ಯಕ್ಷರು ಹಾಗೂ ಮುಖ್ಯಾಧಿಕಾರಿಗಳಿಗೆ ಮನವಿ ಮಾಡಿದ್ದಾರೆ.

ಕಳೆದ ಹಲವಾರು ದಶಕಗಳಿಂದ ಹುಳಿಯಾರಿನಲ್ಲಿ ಹಿಂದೂ ರುದ್ರಭೂಮಿ ಇಲ್ಲದಿರುವುದು ಸಮಸ್ಯೆಯಾಗಿದೆ.ಹಿಂದೆ ಜನಸಂಖ್ಯೆ ಕಡಿಮೆಯಿದ್ದು ಹೇಗೋ ಆಗುತ್ತಿತ್ತು.ಇದೀಗ ಹುಳಿಯಾರು ಪಟ್ಟಣ ಅಭಿವೃದ್ಧಿಯಾಗಿದ್ದು ಜನಸಂಖ್ಯೆಯಲ್ಲಿ ಏರಿಕೆ ಕಂಡಿದೆ. ಅಲ್ಲದೆ ರುದ್ರಭೂಮಿಗೆ ಸ್ಥಳ ಕಾಯ್ದಿರಿಸುವಂತೆ ಸುತ್ತೋಲೆ ಸಹ ಸರ್ಕಾರದಿಂದ ಬಂದಿದ್ದು , ಅಧಿಕಾರಿಗಳು ಈಗಾಲಾದಾರೂ ಇಲ್ಲಿನ ಜನಕ್ಕೆ ಅತಿ  ಅಗತ್ಯವಿರುವ ಹಿಂದೂ ರುದ್ರಭೂಮಿಗೆ ಸ್ಥಳ ಗುರುತಿಸಿ ಅಭಿವೃದ್ಧಿಪಡಿಸುವಂತೆ ಅವರು ಮನವಿ ಮಾಡಿದ್ದಾರೆ.

ರುದ್ರಭೂಮಿ ಅಗತ್ಯತೆ ಬಗ್ಗೆ ಕಳೆದ ಎಂಟು ತಿಂಗಳ ಹಿಂದೆ ನಾನೇ ಖುದ್ದಾಗಿಹ ಪಟ್ಟಣ ಪಂಚಾಯಿತಿ ಅಧಿಕಾರಿಗಳಿಗೆ ಅರ್ಜಿ ಸಲ್ಲಿಸಿದ್ದರು ಸಹ ಅಧಿಕಾರಿಗಳು ಯಾವುದೇ ಕ್ರಮ ಕೈಗೊಂಡಿಲ್ಲ. ಇದೀಗ ಇದೇ ತಿಂಗಳ 9 ರಂದು ಅಂದರೆ ದಿನಾಂಕ: 9-2-2022 ರಂದು ಪಟ್ಟಣ ಪಂಚಾಯಿತಿಯ ಪ್ರಥಮ ಸಭೆ ನಡೆಯಲಿದ್ದು,ಅಂದಿನ ಸಭೆಯಲ್ಲಿ ಇದರ ಬಗ್ಗೆ ಚರ್ಚಿಸಿ ಸೂಕ್ತ ನಿರ್ಧಾರ ತೆಗೆದುಕೊಂಡು ಸಾರ್ವಜನಿಕರ ಸಮಸ್ಯೆಗೆ ಇತಿಶ್ರೀ ಹಾಡಬೇಕೆಂದು ಅವರು ಒತ್ತಾಯಿಸಿದ್ದಾರೆ.