ಬಿರು ಬಿಸಿಲನ್ನು ಲೆಕ್ಕಿಸದೆ ಪಟ್ಟಣದಾದ್ಯಂತೆ ಗುರುವಾರ ವಿವಿಧ ಪಕ್ಷದ ಮುಖಂಡರು ಹಾಗೂ ಕಾರ್ಯಕರ್ತರು ಅಬ್ಬರದ ಪ್ರಚಾರ ನಡೆಸಿದರು.ಒಂದು ಕಡೆ ಬಿಜೆಪಿ ಪಕ್ಷದ ಕಿರಣ್ ಕುಮಾರ್ ತಮ್ಮ ಪಕ್ಷದ ಕಾರ್ಯಕರ್ತರೊಂದಿಗೆ ಮನೆಮನೆಗಳಿಗೆ ತೆರಳಿ ಮತಯಾಚಿಸುತ್ತಿದ್ದು,ಕಾರ್ಯಕರ್ತರು ಜೈಕಾರಗಳನ್ನು ಹಾಕುತ್ತಾ ತಮ್ಮ ನಾಯಕನಿಗೆ ಓಟು ಕೊಡಿ ಎಂದು ಕೇಳುತ್ತಿದ್ದರು.
ಮತ್ತೊಂದೆಡೆ ರೈತಸಂಘದ ಅಭ್ಯರ್ಥಿ ಕೆಂಕೆರೆ ಸತೀಶ್ ಮಾರ್ಕೆಟ್ ಯಾರ್ಡ್,ವಠಾರ, ಶಂಕರಪುರ,ವಸಂತನಗರ,ಅಮಾನಿಕೆರೆ ಹೀಗೆ ವಿವಿಧ ಬಡಾವಣೆಗಳಲ್ಲಿ ಅಪಾರ ಸಂಖ್ಯೆಯ ರೈತರೊಂದಿಗೆ ಸುತ್ತಿ ಕ್ಷೇತ್ರದ ಅಭಿವೃದ್ಧಿಗೆ ಉದ್ದೇಶಿಸಿರುವ ಯೋಜನೆಗಳ ಬಗ್ಗೆ ಭಿತ್ತಿಪತ್ರಗಳನ್ನು ಹಂಚುತ್ತಾ ಓಟಿನೊಂದಿಗೆ ಒಂದು ನೋಟು ಕೊಡಿ ಎಂದು ಸಾಗುತ್ತಾ ನಡೆದರೆ, ಜೆಡಿಎಸ್ ಪಕ್ಷದ ಸಿ.ಬಿ.ಸುರೇಶ್ ಬಾಬು ಅವರ ಅನುಪಸ್ಥಿಯಲ್ಲಿಯೂ ಅವರ ಪರ ಮುಖಂಡರಾದ ಬೈಜು ಸಾಬ್.ಮಾಜಿ ತಾಪಂ ಸದಸ್ಯ ಶಿವನಂಜಪ್ಪ ,ತರಕಾರಿ ರಘು,ಲಲಿತ ಹಾಗೂ ಶೌಕತ್ ನೇತೃತ್ವದಲ್ಲಿ ಜೆಡಿಎಸ್ ಕಾರ್ಯಕರ್ತರು ಮನೆಮನೆಗಳಿಗೆ ತೆರಳಿ ಜೇಡಿಎಸ್ ಪಕ್ಷಕ್ಕೆ ಮತಯಾಚಿಸುತ್ತಿದ್ದರು.
ಕೆಜೆಪಿ ಪಕ್ಷದ ಜೆ.ಸಿ.ಮಾಧುಸ್ವಾಮಿ ಪರವಾಗಿ ಸ್ಥಳಿಯ ಮುಖಂಡರುಗಳಾದ ಜಹೀರ್ ಸಾಬ್, ಕಾರ್ಗಿಲ್ ಸತೀಶ್,ಗ್ರಾಪಂ ಸದಸ್ಯರುಗಳಾದ ಬಡ್ಡಿ ಪುಟ್ಟಣ್ಣ, ಭೈರೇಶ್, ಅಶೋಕ್ ಬಾಬು ಸೇರದಂತೆ ಅಪಾರ ಅಭಿಮಾನಿಗಳು ಪಟ್ಟಣದ ವಿವಿಧ ಬದಾವಣೆಯಲ್ಲಿ ಮಾಜಿ ಮುಖ್ಯಮಂತ್ರಿ ಯಡಿಯೂರಪ್ಪನವರ ಸಾಧನೆಗಳನ್ನು ಬಿಂಬಿಸಿ,ಕ್ಷೇತ್ರದ ಬಗ್ಗೆ ಮಾಧುಸ್ವಾಮಿಯವರ ಸಾಧನೆಗಳುಳ್ಳ ಕರಪತ್ರ ಹಂಚುತ್ತಾ ಸಾಗಿದರು.ಒಟ್ಟಾರೆ ಇಂದು ಪಟ್ಟಣದಲ್ಲಿ ಗುರುವಾರದ ಸಂತೆ ಇದ್ದು ಹೋಬಳಿಯ ಸುತ್ತಮುತ್ತಲಿನ ಹಳ್ಳಿಗಳ ಸಾಕಷ್ಟು ಜನ ಬರುತ್ತಾರೆ ಎಂಬುದನ್ನು ಮನಗಂಡು ವಿವಿಧ ಪಕ್ಷದವರು ಒಂದೇ ದಿನ ಪಟ್ಟಣದಾದ್ಯಂತ ಪ್ರಚಾರ ನಡೆಸಿದ್ದಾರೆ.
ಕಾಮೆಂಟ್ಗಳು
ಕಾಮೆಂಟ್ ಪೋಸ್ಟ್ ಮಾಡಿ