ಇದು ಗ್ರಾಮಸಭೆಯಲ್ಲ ಗದ್ದಲದ ಸಭೆ

ಗದ್ದಲದಲ್ಲೆ ಮುಗಿದ ಹುಳಿಯಾರು ಗ್ರಾಪಂ ಗ್ರಾಮ ಸಭೆ

--------------------------

         ವಿವಿಧ ಯೋಜನೆಯ ಫಲಾನುಭವಿಗಳ ಆಯ್ಕೆ ಕುರಿತು ಕರೆಯಲಾಗಿದ್ದ ಹುಳಿಯಾರುಗ್ರಾಮಸಭೆ ಸಾರ್ವಜನಿಕರ ಗದ್ದಲಕ್ಕೆ ಬಲಿಯಾಯಿತು.

                    ಪೂರ್ವ ನಿಯೋಜನೆಯಂತೆ ಬುಧವಾರ ಬೆಳಗ್ಗೆ ಹುಳಿಯಾರು ಗ್ರಾಮಪಂಚಾಯಿತಿ ಆವರಣದಲ್ಲಿ ೨೦೧೫-೧೬ ನೇ ಸಾಲಿನ ಇಂದಿರಾ ಆವಾಸ್ ಮತ್ತು ಬಸವ ವಸತಿ ಯೋಜನೆಯ ಫಲಾನುಭವಿಗಳ ಆಯ್ಕೆಮಾಡಲು ಗ್ರಾಮಸಭೆಯನ್ನು ಕರೆಯಲಾಗಿತ್ತು. ಗ್ರಾಮಸಭೆ ಬಗ್ಗೆ ತಿಳುವಳಿಕೆ ನೀಡಲು ಕರಪತ್ರಗಳನ್ನು ಹಂಚಲಾಗಿತ್ತು.ಅಲ್ಲದೆ ಪಟ್ಟಣದ ಎಲ್ಲಾ ವಾರ್ಡುಗಳಲ್ಲಿ ವಾರ್ಡ್ ಸಭೆ ನಡೆಸಿ ವಸತಿ ಯೋಜನೆಯ ಅರ್ಹರಿಂದ ಅರ್ಜಿಯನ್ನು ಸ್ವೀಕರಿಸಲಾಗಿತ್ತು.

ಹುಳಿಯಾರಿನಲ್ಲಿ ವಸತಿಯೋಜನೆ ಫಲಾನುಭವಿಗಳ ಆಯ್ಕೆಗಾಗಿ ನಡೆದ ಗ್ರಾಮ ಸಭೆ

                ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿ ಅಡವೀಶ್ ಕುಮಾರ್ ಎಲ್ಲರನ್ನು ಸ್ವಾಗತಿಸಿ ೨೦೧೫-೧೬ನೇ ಸಾಲಿನ ಇಂದಿರಾ ಅವಾಜ್ ಮತ್ತು ಬಸವ ವಸತಿ ಯೋಜನೆಯಡಿ ೫೪ ಮನೆಗಳು ಮಂಜೂರಾಗಿದ್ದು ನಿಯಮಾವಳಿಯಂತೆ ಪರಿಶಿಷ್ಟ ಜಾತಿ,ಪರಿಶಿಷ್ಟ ಪಂಗಡ, ಅಲ್ಪಸಂಖ್ಯಾತ ಹಾಗೂ ಇತರ ಸಮುದಾಯಗಳ ಪಲಾನುಭವಿಗಳ ಪಾರದರ್ಶಕ ಆಯ್ಕೆಗಾಗಿ ಗ್ರಾಮ ಸಭೆ ಆಯೋಜಿಸಲಾಗಿದೆ .ಪ್ರತಿ ವಾರ್ಡಿನಲ್ಲೂ ಅರ್ಜಿ ಪಡೆದು ಪರಿಶೀಲಿಸಿ ಫಲಾನುಭವಿಗಳ ಆಯ್ಕೆ ಮಾಡಲಾಗಿದೆ.ಅಲ್ಲಿ ಆಯ್ಕೆಯಾಗದವರನ್ನು ಇಲ್ಲಿ ಆಯ್ಕೆ ಮಾಡಲಾಗುವುದು ಎಂದರು.

                ಎಲ್ಲಾ ವಾರ್ಡುಗಳಲ್ಲಿ ಆಯ್ಕೆ ಮಾಡಲಾಗಿರುವ ಹಾಗೂ ಅರ್ಜಿ ಸ್ವೀಕರಿಸುವವರ ಹೆಸರುಗಳನ್ನು ಓದಲಾಯಿತು.

          ಸಭೆ ಪ್ರಾರಂಭವಾಗುವುದನ್ನೆ ಕಾಯುತ್ತಿದ್ದ ಸಾರ್ವಜನಿಕರು ಸಭೆ ಶುರುವಾಗುತ್ತಿದ್ದಂತೆಯೇ ಪಂಚಾಯ್ತಿವ್ಯಾಪ್ತಿಯಲ್ಲಿ ಎಲ್ಲಡೆ ನೀರಿನ ಸಮಸ್ಯೆ,ಸ್ವಚ್ಛತಾ ಸಮಸ್ಯೆ ತಲೆದೋರಿದ್ದು ಕಳೆದೆರಡು ವರ್ಷಗಳಿಂದ ಗ್ರಾಮಸಭೆಯನ್ನು ನಡೆಸಿಲ್ಲವೇಕೆಂದು ಅಧಿಕಾರಿಗಳು ಮತ್ತು ಸದಸ್ಯರುಗಳನ್ನು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡರು.ಇ ಸ್ವತ್ತು ಖಾತೆಗಳನ್ನು ಮಾಡಲು ಸತಾಯಿಸಲಾಗುತ್ತಿದೆ.ಅಧಿಕಾರಿಗಳು ಮತ್ತು ಸಿಬ್ಬಂದಿಗಳು ಹಣಮಾಡತೊಡಗಿದ್ದಾರೆಂದು ಸಭೆಯಲ್ಲಿ ಆರೋಪಿಸಿದರು.

                   ವಾರ್ಡು ಸಭೆಯಲ್ಲಿ ಆಯ್ಕೆ ಮಾಡಲಾಗಿರುವ ಫಲಾನುಭವಿಗಳ ಆಯ್ಕೆಯಲ್ಲಿ ಗೊಂದಲವಿದ್ದು ಅರ್ಹರನ್ನು ಗುರುತಿಸುವಲ್ಲಿ ಸದಸ್ಯರು ಹಾಗೂ ಪಿಡಿಒ ನಿರ್ಲಕ್ಷ್ಯತೆ ತೋರಿದ್ದು ಕೆಲವರಿಗೆ ಅನ್ಯಾಯವಾಗಿದೆ ಎಂದು ದೂರಿದರು.ಕೆಲವೇ ಸದಸ್ಯರು ಸೇರಿಕೊಂಡು ತಮಗೆ ಬೇಕಾದ ಫಲಾನುಭವಿಗಳನ್ನು ಆಯ್ಕೆ ಮಾಡಿದ್ದಾರೆ.ಯೋಜನೆಯ ನಿಬಂಧನೆಗಳನ್ನು ಗಾಳಿಗೆ ತೂರಿ ಗುಡಿಸಲು ವಾಸಿಗಳಿಗೆ ಹಂಚಿಕೆ ಮಾಡಬೇಕಾಗಿದ್ದ ಮನೆಗಳನ್ನು ಎಲ್ಲಾ ಸೌಕರ್ಯವಿರುವವರಿಗೆ ನೀಡಲಾಗಿದೆ ಎಂದು ಆರೋಪಿಸಿದರು. ಈ ಯೋಜನೆಯಲ್ಲಿ ಬಂದಿರುವ ಮನೆಯ ಬಗ್ಗೆ ಆಯಾ ವಾರ್ಡುಗಳಲ್ಲಿ ಸರಿಯಾಗಿ ಪ್ರಚಾರ ನಡೆಸಿಲ್ಲ.ಆಯ್ಕೆ ಮಾಡಲಾಗಿರುವ ಫಲಾನುಭವಿಗಳ ಆಯ್ಕೆಯನ್ನು ಪುನರ್ ಪರಿಶೀಲಿಸಿ ಅರ್ಹ ಫಲಾನುಭವಿಗಳಿಗೆ ಮನೆ ನೀಡಬೇಕೆಂದು ಒತ್ತಾಯಿಸಿದರು.

ಗ್ರಾಮಸಭೆಯಲ್ಲಿ ನಡೆದ ಗದ್ದಲ ನಿಯಂತ್ರಿಸಲು ಆಗಮಿಸಿದ್ದ ಪೋಲಿಸರು.

                         ಅಧ್ಯಕ್ಷತೆ ವಹಿಸಿದ್ದ ಪಂಚಾಯಿತಿ ಅಧ್ಯಕ್ಷರಾದ ಹೆಚ್.ಎನ್.ಗೀತಾ ಮಾತನಾಡಿ ವಸತಿ ಯೋಜನೆಯ ಫಲಾನುಭವಿಗಳನ್ನು ಆಯ್ಕೆ ಪಾರದರ್ಶಕವಾಗಿದ್ದು ಸಾರ್ವಜನಿಕರು ತಮಗೆ ಸಮಸ್ಯೆಗಳು ಎದುರಾದರೆ ಕಚೇರಿಗೆ ನೇರವಾಗಿ ಭೇಟಿ ನೀಡಿ ಅಥವಾ ತಮಗೆ ದೂರನ್ನು ನೀಡುವ ಮೂಲಕ ಪರಿಹಾರ ಕಂಡುಕೊಳ್ಳಬೇಕು ಎಂದರು.

ಸಭೆಯ ನೊಡೆಲ್ ಅಧಿಕಾರಿಯಾಗಿ ಸಹಾಯಕ ಕಾರ್ಯಪಾಲಕ ಅಭಿಯಂತರ ದೇವರಾಜು ಆಗಮಿಸಿದ್ದರು.ಜಿಪಂ ಸದಸ್ಯೆ ಎನ್.ಜಿ.ಮಂಜುಳಾ,ಪಂಚಾಯಿತಿ ಉಪಾಧ್ಯಕ್ಷ ಗಣೇಶ್, ಸದಸ್ಯರಾದ ಜಬೀಉಲ್ಲಾ,ಸಿದ್ದಗಂಗಮ್ಮ,ಧನುಷ್ ರಂಗನಾಥ್,ಗೀತಾ ಅಶೋಕ್,ದಯಾನಂದ್,

ರಂಗಮ್ಮ, ರಾಘವೇಂದ್ರ, ಶ್ರಿನಿವಾಸ್,ಚಂದ್ರಣ್ಣ,ಪಟಾಕಿ ಶಿವಣ್ಣ,ಪುಟ್ಟರಾಜು,ಡಾಬಾಸುರೇಶ್,

 ವೆಂಕಟೇಶ್,ಬಿಂದು ರಮೇಶ್,ಅಹ್ಮದ್ ಖಾನ್,ಕಾಯಿ ಕುಮಾರ್ ಮತ್ತಿತರ ಸದಸ್ಯರು ಉಪಸ್ಥಿತರಿದ್ದರು.

-------------------------------------------

ಸಭೆ ಪ್ರಾರಂಭದಿಂದ ಅಂತ್ಯದವರೆಗೂ ಬರಿ ಗದ್ದಲದಿಂದಲೇ ಕೂಡಿತ್ತು..ಸರಿಯಾದ ಆಸನದ ವ್ಯವಸ್ಥೆಯಿಲ್ಲದೆ ಸಾರ್ವಜನಿಕರು ಗ್ರಾಮಸಭೆಯಲ್ಲಿ ನಿಂತೆ ಮಾತಾಡೂವಂತಾಯಿತು.ಸಾಲದಕ್ಕೆ ಮೈಕ್ ವ್ಯವಸ್ಥೆ ಸರಿಯಿಲ್ಲದೆ ಯಾರೇನೂ ಮಾತಾಡುತ್ತಿದ್ದಾರೆಂಬುದೆ ಕೇಳದಂತಾಗಿತ್ತು. ಸಭೆಯಲ್ಲಿ ಕುಳಿತಿದ್ದವರು ಅಧ್ಯಕ್ಷರ ವೇದಿಕೆ ಮುಂದೆ ಜಮಾಯಿಸಿ ಏರು ಧ್ವನಿಯಲ್ಲಿ ಮೇಜು ಕುಟ್ಟಿ ಮಾತಾಡುವುದು ನಡೆದೆಯಿತ್ತು.ಸಭೆಗೆ ಆಗಮಿಸಿದ್ದವರನ್ನು ಕೂರಿಸಿವುದರೊಳಗೆ ಪೋಲಿಸರು ಹೈರಾಣಾದರು.ಗ್ರಾಪಂ ಚುನಾವಣೆಯಲ್ಲಿ ಸೋತಿದ್ದವರಿಗೆ ಈ ಗ್ರಾಮ ಸಭೆ ಅಸ್ತ್ರ ದೊರೆತಂತಾಗಿದ್ದು ಅನಗತ್ಯ ಗೊಂದಲ,ಕದನ ಹುಟ್ಟು ಹಾಕಲು ಕಾರಣವಾಯಿತು

--------------------------------------------