ಗಗನಕ್ಕೇರಿರುವ ಹೂ,ಹಣ್ಣುಗಳ ಬೆಲೆಯ ನಡುವೆಯೂ ಶ್ರಾವಣ ಮಾಸದ ಎರಡನೇ ಶುಕ್ರವಾರ ಬರುವ ವರಮಹಾಲಕ್ಷ್ಮಿ ಹಬ್ಬವನ್ನು ಪಟ್ಟಣದೆಲ್ಲೆಡೆ ಮಹಿಳೆಯರು ಶ್ರದ್ದಾಭಕ್ತಿ ,ಸಡಗರ ಸಂಭ್ರಮದಿಂದ ಆಚರಿಸಿದರು.ವಿವಿಧ ದೇವಾಲಯಗಳಲ್ಲಿ ಮತ್ತು ಮನೆಮನೆಗಳಲ್ಲಿ ಮಹಾಲಕ್ಷ್ಮಿಯನ್ನು ಪ್ರತಿಷ್ಠಾಪಿಸಿ ಮಹಿಳೆಯರು ವಿಶೇಷವಾಗಿ ಅಲಂಕರಿಸಿ ಪೂಜೆ ನೆರವೇರಿಸುವ ದೃಶ್ಯ ಎಲ್ಲೆಡೆ ಕಂಡು ಬಂತು.
ಗುರುವಾರದಂದೇ ಹಬ್ಬಕ್ಕೆ ಬೇಕಾದ ಹೂ,ಹಣ್ಣು ಸೇರಿದಂತೆ ಇನ್ನಿತರ ವಸ್ತುಗಳನ್ನು ಮಾರುಕಟ್ಟೆಯಿಂದ ತಂದು ಅಣಿಮಾಡಿಕೊಂಡಿದ್ದು,ಶುಕ್ರವಾರ ಮುಂಜಾನೆ ವ್ರತಮಾಡುವವರ ಮನೆಗಳಲ್ಲಿ ಲಕ್ಷ್ಮಿಕಳಶವನ್ನು ಪ್ರತಿಷ್ಠಾಪಿಸಿ ಸೀರೆ,ಬಾಳೆಕಂದು,ಕಬ್ಬಿನಜಲ್ಲೆ,ಹೂವು,ಚಿನ್ನ-ಬೆಳ್ಳಿಯ ಆಭರಣಗಳಿಂದ ಅಲಂಕರಿಸಿ ಪೂಜಿಸಿ .ಐಶ್ವರ್ಯ,ಆರೋಗ್ಯ, ಸಮಸ್ತ ಶುಭಫಲಗಳು ಕೈಗೂಡಲಿ ಎಂದು ಪ್ರಾರ್ಥಿಸಿದರು.ಹಣ, ವಸ್ತು, ಒಡವೆ ಸೇರಿದಂತೆ ಐಶ್ವರ್ಯಸಿರಿಯನ್ನು ಪೂಜಿಸುವ ಸಡಗರ ಎಲ್ಲೆಡೆ ಕಂಡುಬಂತು.
ಒಬ್ಬಟ್ಟು,ಪಾಯಿಸ ಸೇರಿದಂತೆ ವಿವಿಧ ಖಾದ್ಯಗಳನ್ನು ನೈವೇದ್ಯವಾಗಿ ಸಮರ್ಪಿಸಿದರು.ಸುಮಂಗಲಿಯರು ಅಕ್ಕಪಕ್ಕದ ಮನೆಯರನ್ನು ಕರೆದು ಅರಿಶಿನ-ಕುಂಕುಮ ಬಾಗಿನ ಕೊಡುವ ಮೂಲಕ ಅವರಿಂದ ಆಶೀರ್ವಾದ ಪಡೆದು,ತಮ್ಮ ಮುತೈದೆತನ ಗಟ್ಟಿಯಾಗಿರಲೆಂದು ಬಿನ್ನವಿಸಿಕೊಂಡು ಹಬ್ಬವನ್ನು ಶ್ರದ್ದಾಭಕ್ತಿಯಿಂದ ಆಚರಿಸಿದರು.
ಇಲ್ಲಿನ ಮಹಾಲಕ್ಷ್ಮಿ ಅಮ್ಮನವರ ದೇವಾಲಯದಲ್ಲಿ ಹಬ್ಬದ ಪ್ರಯುಕ್ತ ದೇವಾಲಯದಲ್ಲಿ ವಿಶೇಷ ಪೂಜಾ ಕಾರ್ಯಕ್ರಮಗಳು ನಡೆದವು.ಹುಳಿಯಾರಮ್ಮ,ಬನಶಂಕರಿ ದೇವಾಲಯ ಹಾಗೂ ದುರ್ಗಾಪಮೇಶ್ವರಿ ಅಮ್ಮನವರು ಸೇರಿದಂತೆ ಎಲ್ಲಾ ಆದಿ ಶಕ್ತಿ ದೇವಾಲಯದಲ್ಲೂ ಸಹ ಅರ್ಚನೆ ,ಅಭಿಷೇಕಾಧಿಗಳು ನೆರವೇರಿತು. ಮಹಿಳೆಯರು ಕುಟುಂಬ ಸಮೇತ ದೇವಾಲಯಕ್ಕೆ ಭೇಟಿ ನೀಡಿ ಅಮ್ಮನವರ ದರ್ಶನ ಪಡೆದರು.
ಕಾಮೆಂಟ್ಗಳು
ಕಾಮೆಂಟ್ ಪೋಸ್ಟ್ ಮಾಡಿ