ವಿದ್ಯಾರ್ಥಿಗಳು ಸಾಧಕರ ಜೀವನ ಚರಿತ್ರೆ ಓದಲಿ

ಹುಳಿಯಾರು: ವಿದ್ಯಾರ್ಥಿಗಳು ಪಠ್ಯದ ಜೊತೆ ಸಾಧಕರ ಜೀವನ ಚರಿತ್ರೆ ಓದಬೇಕು ಎಂದು ಸರ್ಕಾರಿ ಪ್ರೌಢಶಾ ಲೆಯ ಶಾಲಾಭಿವೃದ್ಧಿ ಸಮಿತಿ ಉಪಾಧ್ಯಕ್ಷ ಹಾಗೂ ಪತ್ರಕರ್ತ ರಂಗನಕೆರೆ ಮಹೇಶ್ ತಿಳಿಸಿದರು.

           

ಹುಳಿಯಾರು ಕೆಂಕೆರೆ ಸರ್ಕಾರಿ ಪದವಿ ಪೂರ್ವ ಕಾಲೇಜಿನ ಆವರಣದಲ್ಲಿ ಸರ್ದಾರ್ ವಲ್ಲಭಾಬಾಯ್ ಪಟೇಲ್ ಜನ್ಮದಿನಾಚರಣೆ ಅಂಗವಾಗಿ ಏರ್ಪಡಿಸಿದ್ದ ರಾಷ್ಟ್ರೀಯ ಏಕತಾ ದಿನಾಚರಣೆಯಲ್ಲಿ ಮಾತನಾಡಿ,ಗಾಂಧೀಜಿಯಂತೆ ವಲ್ಲಭಭಾಯ್ ಪಟೇಲರು ಸಹ ಬ್ರಿಟೀಷರ ನಿದ್ದೆಗೆಡಿಸಿದ್ದರು. ಉಕ್ಕಿನ ಮನುಷ್ಯರೆಂದೆ ಹೆಸರಾಗಿದ್ದ ಇವರ ಸಾಧನೆ ಹಾಗೂ ಹೋರಾಟಕ್ಕೆ ದೇಶದ ಮೊದಲ ಪ್ರಧಾನಿಯಾಗಬೇಕಿತ್ತಾದರೂ ಕೆಲವರ ಕುತಂತ್ರದಿಂದ ವಂಚಿತರಾದರು. ಇಂತಹ ಮಹಾನ್ ವ್ಯಕ್ತಿಯನ್ನು ಮರೆತು ಇಲ್ಲಿಯವರೆಗೂ ದಿನಾಚರಣೆ ಆಚರಿಸದಿದ್ದು ವಿಷಾದನೀಯ. ಸರ್ಕಾರ ಈಗಲಾದರೂ ಎಚ್ಚೆತ್ತುಕೊಂಡು ಇವರ ಜನ್ಮ ದಿನಾಚರಣೆ ಆಚರಿಸಲು ಮುಂದಾಗಿ ಇವರ ದಿನಾಚರಣೆಯನ್ನು ರಾಷ್ಟ್ರೀಯ ಏಕತಾ ದಿನಾಚರಣೆಯಾಗಿ ಘೋಷಿಸಿ ಆಚರಿಸುತ್ತಿರುವುದು ಸಾರ್ಥಕವಾಗಿದೆ. ವಿದ್ಯಾರ್ಥಿಗಳು ಸರ್ದಾರ್ ದಿನಾಚರಣೆ ಮಾಡಿದರೆ ಸಾಲದು ಸಾಧನೆ, ಆದರ್ಶ ಮೈಗೂಡಿಸಿಕೊಳ್ಳಬೇಕು ಎಂದರು.

            ಇತಿಹಾಸ ಉಪನ್ಯಾಸಕ ಯೋಗೀಶ್ ಮಾತನಾಡಿ ಸರ್ದಾರ್ ವಲ್ಲಭಭಾಯ್ ಪಟೇಲ್‌ರ ಜೀವನ ಚರಿತ್ರೆ, ಸಾಧನೆ ಬದುಕಿನಲ್ಲಿ ನಡೆದ ಸಂಕಷ್ಟ ದಿನಗಳ ಬಗ್ಗೆ ಮಾಹಿತಿ ನೀಡಿದರು.

       ಕಾಲೇಜಿನ ಕ್ರೀಡಾ ವಿಭಾಗದಲ್ಲಿ ತಾಲ್ಲೂಕು ಮತ್ತು ಜಿಲ್ಲಾ ಮಟ್ಟಕ್ಕೆ ಆಯ್ಕೆಯಾದ ವಿದ್ಯಾರ್ಥಿ ವಿದ್ಯಾರ್ಥಿನಿಯರಿಗೆ ಪ್ರಶಸ್ತಿ ಪತ್ರ, ಬಹುಮಾನ ವಿತರಿಸಲಾಯಿತು. ಪ್ರಾಂಶುಪಾಲ ಶಿವರುದ್ರಪ್ಪ ಅಧ್ಯಕ್ಷತೆ ವಹಿಸಿದರು. ಉಪನ್ಯಾಸಕರುಗಳಾದ ನಾರಾಯಣ್, ಅನಂತಯ್ಯ, ಶಶಿಭೂಷಣ್, ರಮೇಶ್, ರೇವಣ್ಣ, ಮಲ್ಲಿಕಾರ್ಜುನ್ ಸೇರಿದಂತೆ ಸಿಬ್ಬಂದಿ ವರ್ಗದವರು ಹಾಗೂ ವಿದ್ಯಾರ್ಥಿಗಳು ಪಾಲ್ಗೊಂಡಿದ್ದರು.