ಹುಳಿಯಾರು ಹೋಬಳಿಯಾದ್ಯಂತ ಶಾಲಾಕಾಲೇಜುಗಳಲ್ಲಿ , ಸರ್ಕಾರಿ ಕಛೇರಿಗಳಲ್ಲಿ ,ಸಂಘ ಸಂಸ್ಥೆಗಳು ಮಾಜಿ ರಾಷ್ಟ್ರಪತಿ ನಿಧನಕ್ಕೆ ಸಂತಾಪ ವ್ಯಕ್ತಪಡಿಸಿದರು.
 |
| ಹುಳಿಯಾರಿನ ಕರವೇ ಪದಾಧಿಕಾರಿಗಳು ಕರವೇ ವೃತ್ತದಲ್ಲಿ ಕಲಾಂ ಅವರ ನಿಧನಕ್ಕೆ ಮೌನಾಚರಣೆ ನಡೆಸಿ, ಸಂತಾಪ ಸೂಚಿಸಿದರು. |
ಕರ್ನಾಟಕ ರಕ್ಷಣಾ ವೇದಿಕೆ ಕಾರ್ಯರ್ತರು ಕರವೇ ವೃತ್ತದಲ್ಲಿ ಅಬ್ದುಲ್ ಕಲಾಂ ಅವರ ಭಾವಚಿತ್ರವನ್ನಿಟ್ಟು ಮೌನಾಚರಣೆ ಮಾಡುವ ಮೂಲಕ ಕಲಾಂ ನಿಧನಕ್ಕೆ ಸಂತಾಪ ಸೂಚಿಸಿದರು.
ಗ್ರಾ.ಪಂ.ಸದಸ್ಯ ಹಾಗೂ ಕರವೇ ಅಧ್ಯಕ್ಷರಾಗಿರುವ ಕೋಳಿ ಶ್ರೀನಿವಾಸ್ ಮಾತನಾಡಿ, ದೇಶಕಂಡ ಮಹಾನ್ ವ್ಯಕ್ತಿಗಳಲ್ಲಿ ಕಲಾಂ ಸಹ ಒಬ್ಬರಾಗಿದ್ದು, ಇಡಿ ಪ್ರಪಂಚಕ್ಕೆ ಪರಿಚಿತರಾದ ವ್ಯಕ್ತಿಯಾಗಿದ್ದವರು. ಬಡತನದಲ್ಲಿ ವಿದ್ಯಾಭ್ಯಾಸ ಕಲಿತ ಕಲಾಂ ಭಾರತದ ರಾಷ್ಟ್ರಪತಿಯಾಗುವ ಮೂಲಕ ಕಠಿಣ ಪರಿಶ್ರಮದಿಂದ ಯಾವ ಸ್ಥಾನವನ್ನಾದರೂ ಪಡೆಯಬಹುದು ಎಂಬುದಕ್ಕೆ ಸಾಕ್ಷಿಯಾಗಿದ್ದರು.ವಿಜ್ಞಾನಿಯಾಗಿ, ಕ್ಷಿಪಣಿ ತಂತ್ರಜ್ಞರಾಗಿ ಅವರ ಕೊಡುಗೆ ಅವಿಸ್ಮರಣೀಯ. ಅವರ ಅಕಾಲಿಕ ಮರಣ ದೇಶಕ್ಕೆ ತುಂಬಲಾರದ ನಷ್ಟವಾಗಿದೆ ಎಂದರು. ಈ ವೇಳೆ ಕರವೇ ಪದಾಧಿಕಾರಿಗಳಾದ ಚಂಬಣ್ಣ, ಮುರುಳಿ,ರಘು,ವಕೀಲ ಮೋಹನ್, ರಂಗಸ್ವಾಮಿ,ಗೌಡಿರಂಗನಾಥ್, ದಿವಾಕರ,ಮೋಹನ್,ಕುಮಾರ್ ಸೇರಿದಂತೆ ಇತರರಿದ್ದರು.
ಪಟ್ಟಣದ ಎಂಪಿಎಸ್ ಶಾಲೆ,ವಾಸವಿ,ಟಿ.ಆರ್.ಎಸ್.ಆರ್,ಕನಕದಾಸ, ಜಿಪಿಯುಸಿ, ಉರ್ದುಶಾಲೆ,ಜ್ಞಾನಜ್ಯೋತಿ,ವಿದ್ಯಾವಾರಿಧಿ ಸ್ಕೂಲ್, ಬಿಎಂಎಸ್ ಕಾಲೇಜು ಸೇರಿದಂತೆ ವಿವಿಧ ಶಾಲಾ-ಕಾಲೇಜುಗಳಲ್ಲೂ ಸಹ ವಿದ್ಯಾರ್ಥಿಗಳು ಹಾಗೂ ಶಿಕ್ಷಕರು ಮೌನಾಚರಣೆ ಮಾಡುವ ಮೂಲಕ ಕಲಾಂ ಅವರ ನಿಧನಕ್ಕೆ ಶ್ರದ್ಧಾಂಜಲಿ ಅರ್ಪಿಸಿದರು. ಪಂಚಾಯ್ತಿಗಳಲ್ಲಿ ಬಾವುಟವನ್ನು ಅರ್ಧಮಟ್ಟಕ್ಕೆ ಹಾರಿಸಿದ್ದರಲ್ಲದೆ,ವಿವಿಧ ಸರ್ಕಾರಿ ಕಛೇರಿಗಳಲ್ಲಿ ಸಂತಾಪ ಸೂಚಕವಾಗಿ ಮೌನಾಚರಣೆ ಮಾಡಿದರು. ಕಲಾಂ ಅವರ ನಿಧನದ ಹಿನ್ನಲೆಯಲ್ಲಿ ಸರ್ಕಾರಿ ರಜೆ ಎಂದು ಎಲ್ಲೆಡೆ ಹರಡಿದ್ದರಿಂದ ಶಾಲಾಕಾಲೇಜುಗಳಲ್ಲಿ ವಿದ್ಯಾರ್ಥಿಗಳ ಸಂಖ್ಯೆ ವಿರಳವಾಗಿತ್ತು. ಶಾಲಾ ಮುಖ್ಯ ಶಿಕ್ಷಕರು ಕಲಾಂ ಅವರ ಜೀವನ,ಅವರು ಬೆಳೆದು ಬಂದ ಬಗೆ ಹಾಗೂ ಅವರ ಸಾಧನೆ ಬಗ್ಗೆ ತಿಳಿಸಿದರು. ನಾಡಕಛೇರಿ, ಅಂಚೆಕಛೇರಿ,ಬ್ಯಾಂಕ್ ಗಳು,ಕೃಷಿ ಇಲಾಖೆ ಎಂದಿನಂತೆ ತಮ್ಮ ಕಾರ್ಯ ನಿರ್ವಹಿಸಿದ್ದವು.
ಕಾಮೆಂಟ್‌ಗಳು
ಕಾಮೆಂಟ್‌ ಪೋಸ್ಟ್‌ ಮಾಡಿ