ಆಮ್ ಆದ್ಮಿ ಜಯ ಇತರ ರಾಜಕಾರಣಿಗಳಿಗೆ ತಕ್ಕ ಪಾಠ

ದೇಶದೆಲ್ಲೆಡೆ ಕುತೂಹಲ ಉಂಟುಮಾಡಿದ್ದ ದೆಹಲಿಯ ಚುನಾವಣೆಯ ಫಲಿತಾಂಶ ಜನರಲ್ಲಿ ಅಶ್ಚರ್ಯ ಹಾಗೂ ಹೊಸ ಹೊಸ ಅಭಿಪ್ರಾಯಗಳನ್ನು ಪುಟಿಯುವಂತೆ ಮಾಡಿದೆ. ಕೇವಲ ೩೫ ಸ್ಥಾನ ದಕ್ಕಬಹುದೆಂದಿದ್ದ ಆಪ್ ಗೆ ೬೭ ಸ್ಥಾನ ದಕ್ಕಿರುವುದು ನಿರೀಕ್ಷೆಗೂ ಮೀರಿದ ಯಶಸ್ಸು ಎಂಬ ಮಾತುಗಳು ಕೇಳಿಬರುತ್ತಿವೆ.

ಆಪ್ ಪಕ್ಷದ ಗೆಲುವಿನ ಬಗ್ಗೆ ಕೇಳಿಬಂದ ಅಭಿಪ್ರಾಯ :

 ಕೆಲಸ ಮಾಡದ ರಾಜಕಾರಣಿಗಳಿಗೆ ಆಮ್ ಆದ್ಮಿ ಪಕ್ಷದ ಗೆಲುವು ತಕ್ಕಪಾಠವಾಗಿದ್ದು , ದೆಹಲಿಯ ಮತದಾರರು ಅದಕ್ಕೆ ಸಾತ್ ನೀಡಿದ್ದಾರೆ. ಬಿಜೆಪಿ ಎಂದರೆ ಮೋದಿ ಎನ್ನುತ್ತಿದ್ದವರು ಹಾಗೂ ಮೋದಿ ಹವಾ ನಡೆಯುತ್ತದೆ ಎಂದು ನಂಬಿದ್ದವರೂ ಸಹ ಈ ಫಲಿತಾಂಶದಿಂದ ನಿಬ್ಬೆರಗಾಗಿದ್ದಾರೆ. ಅಲ್ಲದೆ ಎಲ್ಲಾ ಸಮೀಕ್ಷೆಗಳನ್ನು ಆಮ್ ಆದ್ಮಿಯ ಕೇಜ್ರಿವಾಲ್ ಅವರು ಬುಡಮೇಲು ಮಾಡಿದ್ದಾರೆ : ಉಮಾಸ್ಟೋರ್ ಮಾಲೀಕ ಭದ್ರೇಶ್

 ಪ್ರಧಾನಿ ಮೋದಿ ಅವರು ತಮ್ಮ ಮಾತಿನಿಂದ ದೇಶದ ಜನರನ್ನು ಸೆಳೆಯಬಹುದು ಎಂದು ನಂಬಿದ್ದರೆ ಅದು ಹುಸಿ, ಜನರಿಗೆ ಮಾತಿಗಿಂದ ಕೆಲಸ ಮಾಡುವವರು ಮುಖ್ಯವಾಗಿದ್ದು ಅದಕ್ಕೆ ಸಾಕ್ಷಿ ಎಂಬಂತೆ ದೆಹಲಿಯಲ್ಲಿ ೭೦ ಸ್ಥಾನಗಳಿಗೆ ೬೭ ಸ್ಥಾನಪಡೆದು ವಿರೋಧ ಪಕ್ಷಕ್ಕೆ ಯಾವಪಕ್ಷವೂ ಬರದಂತೆ ಅಭೂತಪೂರ್ವ ಗೆಲುವುಸಾಧಿಸಿರುವುದು ಹೆಮ್ಮೆಯ ವಿಚಾರ : ಚಿರುಮುರಿ ಅಂಗಡಿ ಶ್ರೀನಿವಾಸ್ 

 ಮೋದಿ ಹಾಗೂ ಅಮಿದ್ ಷಾ ಜೋಡಿಯ ಮ್ಯಾಜಿಕ್ ಆಪ್ ಸುಂಟರಗಾಳಿಗೆ ತರಗೆಲೆಯಂತಾಗಿದ್ದು ಬದಲಾವಣೆಯ ಪ್ರತೀಕವಾಗಿದೆ.ಐತಿಹಾಸಿಕ ಪಕ್ಷವಾದ ಕಾಂಗ್ರೆಸ್ ಶೂನ್ಯ ಸಾಧನೆ ಮಾಡಿದ್ದು, ದೆಹಲಿ ಇದೀಗ ಕಾಂಗ್ರೆಸ್ ಮುಕ್ತವಾಗಿದೆ : ಗ್ರಾ.ಪಂ.ಸದಸ್ಯ ಗಂಗಣ್ಣ.

ಚುನಾವಣೆಯಲ್ಲಿ ದೆಹಲಿಯ ಮತದಾರರು ಐತಿಹಾಸಿಕ ತೀರ್ಪು ನೀಡಿದ್ದು ಪೊರಕೆಯ ಅಬ್ಬರಕ್ಕೆ ಯಾವ ಪಕ್ಷಗಳು ಹೇಳ ಹೆಸರಿಲ್ಲದಂತಾಗಿದ್ದು ಕಳಾಹೀನ ಸೋಲು ಅನುಭವಿಸಿವೆ.ಇದು ಜಾತಿ , ಹೆಂಡ ಮೀರಿದ ಮತದಾನವಾಗಿದ್ದು ಮುಂದಿನ ದಿನಗಳ ಬದಲಾವಣೆಯ ಸೂಚಕವಾಗಿದೆ: ಸುದರ್ಶನ್ , ಅಂಬಿಕಾ ಸ್ಟುಡಿಯೋ.