ಶ್ರದ್ದಾಭಕ್ತಿಯಿಂದ ದುರ್ಗಮ್ಮ ಬಾನ ಆಚರಣೆ

ಹುಳಿಯಾರು  ಪಟ್ಟಣದ ಗ್ರಾಮದೇವತೆ ಶ್ರೀ ದುರ್ಗಾಪರಮೇಶ್ವರಿ ದೇವಿಯ ೪೫ನೇ ವರ್ಷದ ಜಾತ್ರಾಮಹೋತ್ಸವದ ಅಂಗವಾಗಿ ಪಟ್ಟಣ ಸೇರಿದಂತೆ ಸುತ್ತಮುತ್ತಲ ಹಳ್ಳಿಯವರು ಮಂಗಳವಾರ ಆರತಿಬಾನ ಹಾಗೂ ಎಡೆಸೇವೆಯನ್ನು ಶ್ರದ್ದಾಭಕ್ತಿಯಿಂದ ಆಚರಿಸಿದರು.

ಹುಳಿಯಾರು ದುರ್ಗಮ್ಮನ ಆರತಿಬಾನದ ಅಂಗವಾಗಿ ಮಂಗಳವಾರ ಮುತ್ತೈದೆಯರು ದೇವಿಗೆ ಆರತಿ ಮಾಡುತ್ತಿರುವುದು.

ಮಂಗಳವಾರ ಮುಂಜಾನೆ ದುರ್ಗಮ್ಮನವರ ಮೂಲ ದೇವರಿಗೆ ಅಭಿಷೇಕ ಅರ್ಚನೆ ಮಾಡಿ ಅಲಂಕರಿಸಲಾಗಿತ್ತು.ಭಕ್ತಾಧಿಗಳು ತಮ್ಮ ಮನೆಯಲ್ಲಿ ಮಡಿಯಿಂದ ನೈವೇದ್ಯ ಹಾಗೂ ಆರತಿಯನ್ನು ಸಿದ್ದಗೊಳಿಸಿಕೊಂಡು ದೇವಾಲಯದಲ್ಲಿಗೆ ಆಗಮಿಸಿ ದೇವಿಗೆ ಆರತಿ ಮಾಡಿ ತಾವು ತಂದಿದ್ದ ನೈವೇದ್ಯವನ್ನು ಅರ್ಪಿಸಿದರು. ಹುಳಿಯಾರು,ಕೋಡಿಪಾಳ್ಯ,ಲಿಂಗಪ್ಪನಪಾಳ್ಯ, ಕಾಮಶೆಟ್ಟಿಪಾಳ್ಯ, ಸೋಮಜ್ಜನಪಾಳ್ಯ, ಕೇಶವಾಪುರ ಸೇರಿದಂತೆ ಸುತ್ತಮುತ್ತಲ ಹಳ್ಳಿಗಳ ಭಕ್ತಾಧಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸಿದ್ದು ದೇವಾಲಯದ ಪ್ರಾಂಗಣದಲ್ಲಿ ಸರದಿಯಲ್ಲಿ ಸಾಗುತ್ತಾ ಆರತಿ ಮಾಡುತ್ತಿದ್ದರು.

ಹುಳಿಯಾರಿನ ಗ್ರಾಮದೇವತೆಗಳಾದ ಶ್ರೀ ದುರ್ಗಾಪರಮೇಶ್ವರಿ ಹಾಗೂ ಹುಳಿಯಾರಮ್ಮನವರಿಗೆ ಪಟೇಲ್ ರಾಜ್ ಕುಮಾರ್ ಅವರ ಮನೆಯಲ್ಲಿ ಸೋಮವಾರ ರಾತ್ರಿ ಮಧುವಣಗಿತ್ತಿ ಸೇವೆ ನಡೆದ ನಂತರ ಮೆರವಣಿಗೆಯಲ್ಲಿ ದೇವಾಲಯಕ್ಕೆ ಕರೆದೊಯ್ಯಲಾಯಿತು.

ಕೆಲ ಭಕ್ತರು ಸಿಹಿ ಆಹಾರವನ್ನು ದೇವಿಗೆ ನೈವೇದ್ಯವಾಗಿ ಅರ್ಪಿಸಿದರೆ ಮಾಂಸಾಹಾರಿಗಳು ಕುರಿ,ಕೋಳಿ,ಮೇಕೆಯನ್ನು ದೇವಾಲಯದ ಮುಂಭಾಗದದಲ್ಲಿ ಪೂಜಿಸಿ ಕತ್ತರಿಸುವ ಮೂಲಕ ದೇವಿಗೆ ಅರ್ಪಿಸುತ್ತಿದ್ದು ಕಂಡುಬಂತು. ಬೆಳಿಗ್ಗಿನಿಂದ ಆರಂಭವಾದ ಭಕ್ತಾದಿಗಳ ಆಗಮನ ಸಂಜೆಯವರೆಗೂ ನಡೆದಿದ್ದು ಅಕ್ಕಪಕ್ಕದ ಹಳ್ಳಿಯವರು ಆಟೋ,ಬೈಕ್ ನಲ್ಲಿ ತಂಡತಂಡವಾಗಿ ಬಂದು ದೇವಿಗೆ ಆರತಿ ಮಾಡಲು ಮುಂದಾಗಿದ್ದರು.